مذكرات شاب فى ايام التجنيد ههههههه ربنا معاكم ياشباب ..

دي مذكرات شاب لسه بيقدم في التجنيد



طبعا المذاكرت بتبدأ بالقسم

طبعا انتوا عارفين القسم طبعا

قسم البوليس

طبعا على الأقل تصحى تصلي الفجر وتستنا شوية وتلحق مكان في الطابور

ولما بتروح تلاقي ناس كتير

دول إيه دول يا عم نايمين قدام القسم دول ولا إيه؟

المهم تلحق ليك مكان

وفي يوم وأنا واقف في الطابور لقينا عربيتين لنقل المسجونين ( ربنا يعافينا )

ونزل المسجونين من القسم وركبوا في العربية

واحد قدامي بيقول لصاحبه

افرض بقا إن كام مسجون هربوا وهما بيتنقلوا، هيجروا وراهم ويجيبوهم؟

الظاهر صاحبه كان مفرفش شوية ضحك وقال

ويجروا ليه ..... هياخدوا كام واحد من الطابور الكبير ده بدل ميتعبوا نفسهم

هههههههههه

ضحكت وقلتله

حلوة أوي دي يا كابتن .. نكتة عسل

ضحك ومد إيده ليا عشان نسلم على بعض

ومين اللي قالك إن دي نكتة ... دي ممكن تحصل

توقفت عن الضحك وبصيت له في ارتياع

تنحنحت حسيت الكلام مش عاوز يطلع

بصيت للعربية والمسجونين بيطلعوا من العربية

والتفت للشخص اللي كان بيتكلم

الظاهر الشمس حامية النهاردة أنا هاجى بكرة أحسن

اتسعت عينا الشاب اللي بيضحك وقال لزميلة

إزاي حامية والنهاردة اليوم مغيم والشمس مطلعتش

هرش في راسه وقال

الظاهر إن فيه ناس مبيحبوش الهزار

وجريت أخرج من القسم

هيه ناقصة جيش لما أدخل سجن كمان

أشوفكم بكرة

تاني قلت أروح بدري شوية

روحت وأنا بقول أنا بقا أول واحد

طبعا للأسف مكنتش أول واحد

بس حلو كنت في العشرة الأوائل

وللأسف تاني العسكري مرضاش يدخلنا

لأن

لأن

لأن العسكري بتاع التجنيد نايم

ومرة تانية زحمة تاني بس بقا إيه

قدام القسم مش جوه

شكلنا بقا فل أوي

ومصادفة عجيبة أوي

إن فيه ناس مش بتحب القسم لو شافونا لقالوا إحنا بنحب حاجة اسمها القسم

الحمد لله دخلنا

وخلصت بعد معاناة

أول ورقة

كانت متعبة صحيح بس خلصتها

وقبل ما أخرج بسأل واحد

يا كابتن هو فيه ورق تاني غير دي

بص للورقة كده وبصلي

وقعد يضحك يضحك

وقالي

إنت لسه خلصت حاجة

بصيت له كده

قولت في نفسي

هيه الناس كئيبة أوي هنا كده ليه دا إحنا لسه على أعتاب الجيش أومال لو دخلنا بقا هنعمل إيه

أكيد هنرقع بالصوت

بس

جينا للفيش الجنائي

طبعا الفيش الجنائي ده عشان يعرفوا إنت عندك سوابق ولا لا

وعلى ما أعتقد الحمد لله مالياش سوابق

لغاية دلوقتي

هحكيلك إزاي اتبصملي على الفيش

طبعا فيه واحد دخل قبلي

عم صبحى هو اللى بيبصم

عم صبحى بيقوله

أي خدمة يا باشا ( يعنى من الآخر طلع إكرامية )

الشاب قاله

مالكش إنت دعوة يا عم صبى ظبطنى وأنا لما أجي أستلم الفيش هظبطك

عم صبحى

طيب ماشى

دخلت أنا وكنت محضر الإكرامية بيقولوا خير البر عاجله

أصلك لو مدفعتش الإكرامية

ممكن للحظ التعس إن بصماتك متظهرش كويس ويرجع الفيش تاني

دا للحظ الوحش أو

لأن عم صبحي مضغطش على إيدك كويس

فخليك حلو وادفع أحسنلك

تاني يوم جيت أستلم الفيش

لقيت الشاب بتاع إمبارح قبلي برضه هيستلم الفيش

عم صبحي بيسلمه الفيش وبيقول

أي خدمة يا باشا

بصله الشاب كده باستغراب وقال

إيه يا عم صبحي إنت مش فاكرني ولا إيه منا مظبطك إمبارح شكلك كده مش فاكر

عم صبحي

يعني إنت ظبطني إمبارح

الشاب

أيوا

عم صبحي

طيب اتفضل الفيش

وسلمه الفيش

ضحك الشاب وهو خارج مستلم الفيش وأنا بضحك معاه

وخلصنا حكاية الفيش

ناقص قصة الفيش الثلاثي

الفيش الثلاثي بقا ...............

لكن دي قصة أخرى

الفيش الثلاثي

والفيش الثلاثي لمن لا يعرفه

برضه بيتعمل في القسم

وبرضه رحنا لعم صبحي تاني

وظبطناه تاني

وأخدنا ميعاد

لليلة الكبيرة

قصدي اليوم الكبير

اليوم ده هيحصل فيه كل حاجة

هتتصور

وهيتكشف عليك

المهم خرج الشاب بدري جدا اليوم ده عشان يلحق يخلص بسرعة

راح هناك لاقى جموع حاشدة من الشباب

ياه كل دول هيدخلوا الجيش

المهم دخلنا وقعدنا على سلالم كبيرة بالعرض

بس

مرة يجيبونا يمين ومرة شمال

أنا حاسس إن المشرفين نفسهم مش عارفين حاجة

المهم جه مدير المنطقة

الرجل كان زي العسل

الناس طبعا اتكتمت

فضل يقول تعليمات وبكل تفصيل ربنا يكرمه والله

راح واحد طلع كده ما بين الناس وساله سؤال غبي

راح بصله المدير كده وقال

اقعد يا بنى خلي اللى جانبك يفهمك ولو اللى جانبك مش فاهم تعالولي بالليل أفهمكم

الناس ضحكت

واحد جانبى هرش في راسه وقال

هو احنا هنقعد هنا لبليل

بصيت ليه وقلت

يا رب ميطلعش علينا الصبح بس

بصلي الشاب اللى جانبي في ذهول حسيت شكله هيضربني

قمت من جانبه أحسن مش عاوزين من أولها خناق

نادوا بعد كده اللى معاهم 6 جند هيدخلوا بسرعة

أما اللى معاهم 7 جند لسه هيقعدوا شوية

انا بقا كنت من المحظوظين اللى معاهم

7 جند .... يعني شكلنا كده بكرة الصبح هنخلص

بس قعدنا على جنب وإحنا بننظر للناس اللى معاهم 6 جند نظرات حسد

ساعة

اتنين

ثلاثة

إيه يا جدعان هما بيعملوا إيه كل ده بيعملوا لينا 6 جند

قعدنا بقا على راحتنا

اللى نام على الارض

واللى رايح يستكشف منطقة التجنيد يمكن يلاقى حمامات ولا ماء

شكلنا كده عامل زى الأسرى

أربع ساعات

خمسة

ستة

المهم

قولنا لا مش هينفع كده

لازم نشوف إيه التأخير

واحد قام مننا وقال لازم نشوف هنعمل إيه

قام وراه جمع مننا وقالوا كلنا وراك

راح كلم العسكرى المخصص

قاله العسكرى

إنت هتعمل مظاهرة تعالى معايا على الأمن

طبعا الشباب اللى وراه كانوا هيبيعوه

لا إحنا مش معاه الكابتن ده

بس الحمد لله ربنا ثبتهم

واحد قال عاوز تاخده خدنا معاه

وكلهم بقوا صف واحد

الحمد لله الواد كان هيروح في دهية

فسابه العسكرى ومشي

كان هيبقا شكله فل خالص في الامن

المهم جه الفرج بعد جوالات

ودخلنا صالة العرض رتبنا ورقنا...



تابع .......

ودخلنا صالة تانية عشان نتصور

دي بقا قعدنا فيها بس

4ساعات على متصورنا

وآخر حاجة تبقى

الكشف الطبي

دخلنا صالة لقينا الشباب قالعين قاعدين بفلنه وشورت

وفيهم من يلبس شيء يشبه الشورت

هو أقل بشوية من الشورت الشرعي

قصدي أقل بكثير

المهم

أنا قلت أتذاكى وأدخل أكشف بالفلنة والشورت مش لازم أقلع خالص

الجو كان ليل شوية وكان فيه شوية برد

دخلنا خلاص هنكشف

وقفونا مربع ناقص ضلع

والدكتور قال

مش عاوز أشوف أي حد إلا بالشوت

ييييييي

أدي الفلنة اللى مش عجباه قلعتها تحبوا تتفرجوا على الكشف الطبي

الدكتور قال

قفوا ارفعوا إيدكم

لفوا

نزلوا إيدكم

مش عارف ليه حسيت إني راقص باليه

خلاص خلص الكشف الطبي

البسوا هدومكم

جرينا بره كده في الطرقة

وكل واحد بيلبس هدومه

مش عارف ليه حسيت بإننا كنا في شقة دعارة والبوليس هجم على الشقة وكل واحد بيجري ومعاه هدومه بيلبسها في الشارع

المهم لبسنا هدومنا

وجرينا نستلم جواب

110

خلوا بالكم

مهم جدا الجواب ده

لقيت نفسي اترشحت ضابط

يا لهوى

الناس دول بيحيوني أوي

وبقى يوم النتيجة

يوم الإرجاء

دا بقى يوم .....

ولا أقولكم

دي قصة تانية

أول ذكريات الشاب في مركز التدريب



مش عارف أبدأ منين

نبدتدى منين منين منين

مش عارف

أنا هقول اللى أفتكره



أول ليلة كانت المركز

دخلونا عنبر فيه سراير لغاية الصبح على ما تستلموا مهمتكم

دخلنا واتوزعنا على السراير لقيت واحد شكله مخنوق

قولت أدي بدايتها شكله واحد مخنوق من نفسه وهيخنوقنا معانا

طبعا اخترت السرير اللى تحت عشان أنا تخين شوية مش مستحمل حد يموت تحتي

المهم دخلنا معانا البطاطين ونمنا

فضل واحد يهرج مع الناس ويضحك ومش عارف إيه

يا جدعان عاوزين ننام

قالوا خلاص اطفوا الكهربا

طفوا الكهربا

الدنيا بقت ظلام دامس

كحل

الراجل اللى كان بيهرج رقع بالصوت مرة واحد وقال

يا مامااااااااااااااااااااا افتحوا النور

من تحت البطانية قلت

هو فى الجيش فيه ماما

ما علينا

قعد بقا يقولنا الدنيا ضلمة ومش هيعرف ينام كده

المهم أقنعناه إنه ينام في الضلمة

أول ما نمنا

شخير واحد

وتبعه آخر

وآخر



مش مهم دا كله

إيه يعني شخير



ساعتين كده

وصحيت على واحد بيتخانق وهو نايم

لا

وبشكل عنيف جدا



يا ليلة بيضا



إحنا لحقنا

آه قبل ما أخلص أول مذكرات

الشخص اللى كان بيتخانق وهو نايم

حظي طلع إنه معايا في العنبر اللى اتوزعنا عليه بعد كده نهائي

لا

وفي السرير اللى جنبي...

طبعا مشكلة النوم دي كانت مشكلة رهيبة

إن إنت كنت متعود على نومة معينة وعلى سريرك وفي بيتك

فكل ده يتغير وتنام مع ناس أول مرة تشوفهم في حياتك

حاجات كتيرة بتتعود عليها

أول صديق عرفته في مركز التدريب كان اسمه برضه عبدو

مش عارف إيه حكاية عبدو دا معايا

الظاهر إنه ورايا ورايا

المهم اتعرفت عليه

وحصل موقف مع عبدو

عبدو ده لما كان بينام مبيحسش بأي حاجة خالص

خالص جدا

وعنده حتة سرينة

لا متقولش عليها للإسعاف ولا حتى المطافي

المهم الناس جت تنام معرفتش

فواحد زهق وقال لا مش عارف أنام

وراح نزل من على سريره

وكان عبدو نايم على مرتبه على الأرض لأن سريره كان بايظ

المهم صاحبنا مسك المرتبة اللى نايم عليها عبدو وعبدو طبعا كان فوقيها نايم وبيشخر طبعا

وفضل يشدها ويسحبها عشان يرمى المرتبه وعبدو فوقيها بره العنبر

ووصل فعلا لنص العنبر

والناس هتموت من الضحك

قولتله لا يا عم مش كده رجعه تانى مش هينفع تنومه بره

المهم الشاب كان قلبه رقيق وطيب

فرجعه تانى

بس مش فى نفس المكان

كل ده

كل ده

وكل اللى بيحصل وعم عبدو نايم وبيشخر وآخر تمام



المهم صحي الصبح

لقى نفسه في مكان تاني خالص

قال إيه ده يا جدعان

أنا إيه اللى جبني هنا

رد عليه صاحبنا بكل براءه وقاله

إنت يا عبدو يا حبيبى قومت وغيرت مكانك

استغرب عبدو

بس شكله كان واخد على الموضوع ومش أول مرة تحصل معاه

قاله عبدو بكل بساطة

آه يمكن

استغرب صاحبنا على إن عبدو أخد الموضوع بكل بساطة كده

وخلص الموقف

آه نسيت

صاحبنا كان ضميره حي شوية وقال لعبدو على الحقيقة

و.......

وبرضه عبدو أخدها ببساطة

الظاهر إنهم كانوا هيرموه من البيت قبل كده يعني إحنا أرحم

باقي المذكرات



طبعا كل كنت في مركز تدريب لسه معرفش أنا كنت هروح فين

لكن في يوم

اتناديت اسماينا

برضه

برضه

برضه

عبدو كان معايا .......... مترحل معايا

وعرفترايحين فين

دهشور



دهشور لا ميه ولا نور

دهشور الاكل بالطابور

دهشور الاجاازة بالنط من فوق السور

طبعا دا لو فى الصحرا سور



طبعا دهشور ليها سمعة خاصة وبعد مقعدت فيها عرفت ان كل واحد عامل غلطة او مغضوب عليه يودوه دهشور

شكلها كانت مشروع معتقل او سجن حربى

الغريب ان عبدو كان فرحان اوى

فيه حد فرحان انه رايح دهشور

عرفت فيما بعد انه متظبط

المهم عرفنا اننا مترحلين

وعارفين ان مفيش ميه

هههههههههههههههههههههههههههههه احسن حاجة بقى يا روان ان الجيش دة للولاد مش للبنات

ههههههههههههههههه و يلا مستنين الباقى


هههههههههههههههههههههههههههههه


الجزء الرابع

cindrella كتب:هههههههههههههههههههههههههههههه احسن حاجة بقى يا روان ان الجيش دة للولاد مش للبنات

ههههههههههههههههه و يلا مستنين الباقى


هههههههههههههههههههههههههههههه


الجزء الرابع